某天，獨自前往一間相熟的茶餐廳吃飯。到達時發覺該處供食客觀看的電視竟停留在明珠台，正在播放公開大學的課堂，由西人教授，無字幕。
問老闆可否轉台，老闆於是轉了去翡翠台，正是城巿論壇的時間。
這時，旁邊一枱食客（共三人：一個師奶，一個阿叔，一個阿伯）大大聲地起哄，要求轉台：「我地唔睇政治架，唔睇呢d嘢，睇跑馬好過！」茶餐廳老闆遂轉回明珠台，繼續是西人講學。「唔識聽英文都睇鬼佬講英文好過啦！」
我開始不滿地望向他們。
餐廳老闆見勢色唔對，於是再轉台，轉往有線新聞台之類的東西，在播放菲律賓人質事件的新聞。
那枱食客繼續好大聲咁聲稱自己唔睇政治，千萬不要看城巿論壇，乜乜物物。
我非常明顯不滿地怒視他們。該枱食客發現，開始朝著我乜乜物物起來。
不怕得罪人，我朝著他們說：「阿叔，唔好成日話唔睇政治啦，你宜家睇新聞都係睇緊政治咋。」
阿叔回說：「新聞等於政治？有無搞錯呀，新聞點會等同政治呀？你真係唔識嘢！」
我說：「菲律賓人質事件都唔算係政治？咁乜嘢係呀？」
阿叔好像有點自知理虧，因為他們想轉移焦點──竟然質問我學歷！（看倌沒有眼花，是的，他們竟然開始問我是甚麼學歷！）「大學生宜家都無用啦，你有無碩士呢？」說些類似讀書少就唔好講咁多嘢云云的東西。
於我不得不好無禮貌地坦然地答：「我係大學生，你就真係返去讀多幾年書先啦！」（注意：我承認這樣罵人是好差的，如果不是對方竟然先意圖用學歷來罵人，我是不會說這種話的）
阿叔轉移視線，竟然又進一步說我英文唔方好云云，又用SHXT和FUXK YOU來問候我。阿伯就說我還年青才會這樣。
一氣之下，我用全英文來反駁他們，一口氣講咗好多句英文（注意：我承認這樣對人是好差的，如果不是對方竟然先意圖用唔識英文來找碴，這是不會發生的）。
阿叔他們看來唔太明我講乜英文，又想轉話題，竟然說：「識英文就好叻咩？你慌唔係d大陸妹，識少少英文就賴醒，專門黏埋d鬼佬……」（他們不停地說我係大陸妹，又發表最憎d人講英文來搵鬼佬的言論，又話聽得出我d英文唔係native speaker那種，又話懷疑我講的根本唔係英文，只是扮講英文，又說懷疑我不會講普通話）
我回說：「可以俾身份證你睇，我係香港人。」幾乎想轉用全普通話與他們溝通。
他們又轉話題，說：「你咁巴閉就唔係好度食嘢，自己返屋企搵工人服侍，睇大電視啦？係度食嘢，有ｘ用咩……」
罵戰發展到這裏，我覺得再同呢班自打咀巴，自己話自己係茶餐廳食嘢係無ｘ用的無聊人繼續糾纏下去都無意思，而且他們不停地轉話題，d理據又無道理。罵人的重點是選擇適當的時候收口，現在就是時候了。於是我唔再出聲，好整以暇地吃飯，還不時邊吃邊望他們，以示收口不代表驚咗佢地。而那枱無聊人就繼續不時單單打打地說些話。
現在讓我們分析一下阿叔阿嬸阿伯們的混亂而複雜的意識型態，他們不斷改變罵人的進路：
(1) 意圖罵人學歷低 -> 學歷至上主義
(2) 意圖罵人唔識英文 -> 親英
(3) 意圖罵人識英文唔係大晒，仲要識普通話 -> 反英，親中
(4) 意圖罵人是大陸妹（還要是搵鬼佬的那種） -> 仇中
(5) 意圖罵人無錢 -> 有錢至上主義
是否感到其精神分裂？
ps 事後發現，原來我當時穿了一件寫著CHINA的運動T-shirt，唉……
沒有留言:
張貼留言